الصداقه من أقوى العلاقات الإنسانيه علاقه يميزهاأنها تجمع عدة مشاعر وأحاسيس في إطارها مثل المحبه التضحيه وغيرها.
يمكن أغلبنا أو أقدر أقول يمكن كلنا حصلت له مواقف مع أصدقاءه منها الحلو ومنها المر منها إللي تقوي العلاقه ومنها إللي تنهيها.
قصتي تتكلم عن هالموضوع تقدرون تقولون إنها تحمل مشاعر أكثر منها أحداث لكني فكرت بعد تفكير طويل أني أعرضها للناس عشان يستفيدون منها.
إحنا كمجتمع للرجال حدود الصداقه غالبا معروفه عندنا وأغلبها تكون للوناسه والمصلحه أنا ماأقول الكل بس أكثرها لكن إللي صار معي شئ ثاني وهاذي قصتي.........
في عام1408هــ , كنا تونا منتقلين لمدينة الرياض والدراسه بدت من أسبوعين تقريبا كنت في سنه رابعه إبتدائي دخلت فصلي الجديد وسوا الأستاذ تعارف بسيط بيني وبين الطلاب , لما جا وقت الراحه طلع الجميع إلا أنا , دخل واحد أسمراني شعره حوسه وأسنانه الأربع الأماميه إللي متكسر وإللي طايح , مشمر أكمامه ووجهه كله مخوش وحالته لله إلا أنه رغم كل هالبلاوي فيه شئ يخليها مو باينه..!!!
قعد يحوس في شنطته ساعه وكل دقيقه يطلع خرابيط وكل شئ يرفع عينه عندي وأخيرا طلع منها نبيطه , وقبل لا يطلع ألتفت علي وكان من النوع إلي كنه بينطحك وهو يطالع , منزل راسه شوي ومعبس طول الوقت بس كانت بريئه أكثر من أن تكون مرعبه..!!
وقال بلدغه طفوليه سببها واضح وهو أسنانه إللي حالتها صعبه : أنت الحين ليش جالس لحالك؟؟
كانت هاذي أول جمله سمعتها من الإنسان إاللي صار بعد كذا أغلى البشر على قلبي , كان معروف عني أني إنطوائي ومنعزل هاذي طبيعتي حتى أني أتوتر لما يكلمني أحد ماأعرفه رديت عليه: بس كذا أنا ماأبي أطلع وبعدين أنا ماأعرف أحد هنا.. وبنفس النظرات إاللي والله أعلم أنها كانت عاده عنده.. تعال معي وأنا أعرفك على نص إللي فالمدرسه...كان يجرني من يدي وأنا أسحبها بخوف...لالا أنا كذا مرتاح قلت لك ماأبي أطلع...
لكن الولد أصر لين طلعني معه بالغصب , وزي ماقال عرفني على نص المدرسه تقريبا لكن تبون الصدق حسيت أني تعلقت فيه هو!! يمكن عشان شخصيته عكسي تماما إجتماعي , خفيف دم والكل يحبه ويحاول يتقرب منه صحيح أنه كان شيطاني ومشاغب لكنه ماكان يتعدى على أحد!! حسيت أني مبهور بشخصيه ورغم أنه ذكي جدا إلا أنه فالدراسه ماكان بالحيل بس كان يعرف يمشي عمره من يومه صغير.
وعلى كثر الاولاد اللي يعرفهم الانه بعد تعلق فيني فوق ما تتصورون صرنا مانتفارق ابد ولايشوفون واحد فينا بدون الثاني.
مرت السنوات وصداقتي تزداد قوتها مع خالد..مرت علينا سنين الطفوله والمراهقه وحنا سوى ودخلنا الجامعه وتخرجنا وحنا عمرنا ماتفرقنا , حتى في السفر ما اذكر ان واحد سافر بدون الثاني إلا إذاكانت السفره مع الاهل , أغلب الناس اللي يعرفونا يحاولون ياخذونا قدوه وكثير منهم يضربون المثل في صداقتنا العميقه؟!!
شئ واحد كنا نطبقه بدون مانحس من يوم حنا صغار , شئ عجزت أغلب الناس أنها تفهمه في تعاملها مع بعض, وهو ان كل واحد فينا كان متقبل الثاني بكل مافيه من عيوب ولاعمر واحد فينا حاول يغير الثاني ويمشيه على طريقته برغم الاختلاف الكبير بينا...
خالد كان فيلسوف بالفطره ولهاسبب علاقاته كثيره , وكنت اتعلم منه كثير لما اسأله كيف يقدر يجمع كل هالناس حوله كان يقول كلمات بسيطه لكن تركت فيني أثر كبير كان يقول:اسمع يابندر الناس لها مشاكلها وكل واحد فالهدنيا صدقني منشغل في نفسه ولا احدتهمه مشاكلك فاذاتبي الناس يحبونك انسى نفسك وفكر فيهم وكيف تساعدهم في حياتهم بقد ماتقدر.
قصتي الاساسيه اللي ابيها توصلكم مو في كيفية صداقتنا لاني معها شرحت ماراح اقدر اوصلكم مدى عمقها لكن الحدث اللي قلب حياتي ولا اظن ترجع زي ماكانت.
في يوم اربعاء جاني خالد للاستراحه اللي نجتمع فيها مع الشباب والفرحه مبينه في عيونه وسحبني من بينهم..تعال بندر ابيك في كلمة راس..لما صرنا برى..عندي لك مفاجأه....وابتسم...انا ذاك الوقت اللي يشوف وجهي يقول خبل اناظر فيه وفاتح فمي.... كمل كلامه.....ابشرك الوالده خطبت لي!!!!!
في هاللحظه حسيت كأنه احد عطاني كف على وجهي.........ايييييييييييييييييييش؟؟؟؟!!!!
طالعني بنفس طريقته يومه صغير واللي ماتغيرت ابدا...وراك تقولها كذا كنك مو مبسوط..وبإرتباك رديت..لا مبسوط بس أنت فاجأتني وصدمتني صراحه!!ماعمرك جبت طاري الزواج!!!!..
ضحك وغمز..عارف بس الوالده اقترحت علي الموضوع وقلت لها مافي مانع , وتوقعت السالفه كلام او على الاقل بتاخذ وقت بس ماشاءالله عليها يومين إلاهي جايتني تقول ترى لقينالك الظاهر انها حاطتها في بالها من زمان وبعدين ما عاد إلاخير والاشرايك؟؟...يعنيللحين ماشفت البنت ياخلُود...افا عليك يابندر!!الحين اقولك توي داري وجيتك بسرعه الوالده تقول انهم حددوا يوم الاثنين عشان اجيهم اشوفها..تفاجأت..الله بهالسرعه؟؟!!..مو اقولك شكل السالفه مطبوخه من قبل.. على كلاً الله يوفقك إن شاءالله... عقبالك_يالرمت_(خالد لما كان صغير كان يحاول يناديني بكلمة الروميت الإنجليزيه لكنه كان يقولها بها الطريقه مشت معنا كذا صارت زي اللقب بيني وبينه), اغتصبت ابتسامه..لا وين الناس علي المهم الحين خلنا نرجع للشباب لايبدى التعليق..
وبتعجب ممزوج بغضب مصطنع رد خالد...لحظه لحظه بندوره الحين أقولك خطبت وزحمه ولا تعزمني على شئ بهالمناسبه؟؟!!
على الاقل ودني لكوفي شوب ياخي!!ضحكت..لاياعمي الحين قهوه وبعد شوي الاحنا في واحد من هالمطاعم حقتك اللي فواتيرها تكسر الظهر تراي اعرفك زين خلاص عشرة عمر..رد..والله انك قعيطي مستخسر فيني؟؟ ...وقعدنا نضحك,حطيت يدي عل كتفه.. ولا يهمك ياخالد اذا صار شئ اكيد ابشر بذيك العشوه اللي يحبها قلبك فالمطعم اللي تختاره وش تبي بعد؟؟!!..."كان ودي اعزمه بس النفسيه عدم".. رد بغمزه.. ماتقصر اصيل يابندر............................................ ..........
ماذا حدث بعد ذلك؟؟؟؟؟؟؟؟؟؟؟؟؟؟
التكمله في الجزء الثاني قريباً
أنتظروني
المدير كابو انتظروني مع قصص جديده
الخميس أغسطس 28, 2008 8:24 am
